الاقتباس ده فكرني بحديث بسيط كان دار بيني وبين بابا وماما مرة في المطبخ، كنت بتكلم مع ماما في حاجة ليها علاقة بالبحث وبابا دخل في الحوار. قالي بكل ثقة: "أنا شخصيًا ضد أن المرأة تشتغل، المفروض تقعد في البيت وتربي عيالها وترعي أسرتها، وعلي فكرة ده بيكرم المرأة أكتر لأنها بتربي المجتمع كله بتربية عيالها وأنها تراعي جوزها." ن

​

 ماما بتشتغل في المدرسة وبتدي دروس من ساعة ما اتخرجت من الكلية لحد دلوقتي. مورثتش حاجة عن أهلها وجهزت نفسها للجواز وكانت بتصرف علي نفسها بنفسها لما أبوها مات وأخواتها اتجوزوا. علمًا بوضعنا الاقتصادي، أنا متأكدة أن كان استحالة أننا نكون في الوضع ده لو أمي مكانتش بتشتغل وبتساهم في مصاريفنا ومصاريف البيت. أنا برضو متأكدة أن بابا علي علم بالحقيقة دي، لكن يمكن بيرفض يقولها بشكل علني لأن المجتمع الأبوي اللي عايشين فيه برضو بيضغط علي الرجالة زي ما بيضغط علي الستات، وبيدفع سردية أن الرجل ميبقاش رجل بحق لو مكفاش بيته وعياله ومراته (اقتصاديًا في المثال ده بالتحديد بس برضو ذكوريًا وجنسيًا) بدون النظر للمجتمع الرأسمالي المتسابق اللي عايشين فيه والأوضاع الأفتصادية اللي بتضطر مش بس أن المرأة تعمل، ولكن أن حتي الأطفال يعملوا في سياقات مختلفة. بابا نفسه كان بيحفز ماما في أوقات في حياتها أنها تشتغل وتدي دروس أكتر عشان نحسن وضعنا الاقتصادي، وفي الوقت ذاته، فاكرة كتير وأنا صغيرة ازاي بابا كان بيزعق في ماما كتير لما تتأخر في الشغل أيام أو لما تقعد هناك “بدون سبب مادي” بس عشان تتونس بصاحباتها. وبالتالي إيمانه بعملها هو مش إيمان بأن عمل المرأة حاجة مهمة في حياتها علي المستوي الشخصي والنفسي، ولكن بيساعد حياته هو وحياة أولادة اقتصاديًا. ده بيبرر بشكل كبير برضو قلة الفسح والخروجات والأنشطة اللي ماما كانت بتعملها قبل الجواز بعد ما اتجوزت، لأنهم بشكل ما كانوا بالنسبة لجوزها حاجات مش مهمة. ن

​

الغريب بالنسبالي أن ماما كانت موافقة علي معظم كلام بابا في الحوار وأن هي دايمًا بتحاول تقنعني “إن الرجال قوامون علي النساء بما أنفقوا”، علي الرغم من أن هي نفسها عارفة أنها كونت نفسها بنفسها وأنها بتشتغل بشكل كبير عشان تحافظ علي وضع الأسرة الاقتصادي. هو ده بالضبط اللي مصطفي حجازي بيشير إليه بالقيود ورواسب الماضي. ماما كانت بترد أوقات علي بابا لما يتدخل في فلوسها الشخصية وهي بتوديها فين أو لما كانت بتتأخر في المدرسة عشان قاعدة مع صحباتها، بس في الوقت نفسه، عمرها ما طرحت قضيتها بشكل جذري أو حست أن هي قضية فعلًا، لأنها بالرغم من كل اللي بحكيه ده، هي مش عارفة حتة الرجالة والستات والأبوية والنسوية دول شغلني ومضايقني ليه. ن

​

وأنا صغيرة، كنت بدخل في صراعات كتير مع أبويا وأمي عشان أحقق أهداف شخصية أو تعليمية أو فنية، أفتكر أن زمان بابا كان أكثر هيمنة وذكورية في الخناقات دي معايا عن ما هو دلوقتي. ده لعدة أسباب، بس برضو سبب كبير منهم أن أنا كل ما كنت بكبر وبفهم أكتر، كل ما بقيت بتكلم عن مشكلتي كمشكلة رجالة وستات؛ مشكلة معاملة مختلفة ما بيني وبين أخويا؛ مشكلة المجتمع الأبوي والذكوري وبالتالي التفسير الأبوي للإسلام، مش بس مشكلة إسراء كفرد. ده أدي الشعور لأبويا أن في مشكلة فعلًا وإدراكي ليها بيزيد يوم بعد يوم، عشان كده علي الرغم من أنه مش بيقتنع بكلامي، بيقتنع أوقات كتير أن وعي وإدراكي وإستقلالي—وأكيد امتيازاتي اللي وصلتني لده كله واللي مكانتش متاحة بنفس الطريقة لأمي—مش هيسمحوا له أنه يتحكم فيا زي ما بيعمل مع أمي. ن

​

​